ఇప్పుడంతా అగమ్య గోచరంగా తోస్తున్నది.
సహనానికీ అసహనానికీ మధ్యన గల
సన్నని విభజనరేఖగూడా
 క్రమేపీ చెరిగిపోతున్నది.

మతం మసిపూసుకున్న మనిషొకడు
సిం హాసనాధీష్టుడయితే జరిగే
దుష్కర్మలన్నీ వరుసగా తమ
నిజరూపాలను మెల్లి మెల్లిగా
బయటపడుతూ భయపెడుతున్నది.

మనిషికీ మనిషికీ మధ్యన అంతరం
అగాధమై అంతరాతరాళాలను తొలిచేస్తున్నది.
రాజకీయం రంగులుమార్చుకునే పనిలో
ముప్పూటలా ముమ్మూర్తులా  మునిగితేలుతున్నది.

మరోప్రస్థానంకోసం మానవత్వం దీక్షగా
ఎదురుచూస్తూ ఊపిరిబిగబట్టుకుని చూస్తున్నది.
సాహితీ గవాక్షం చెంతన సమసమాజభావన
సాగిలబడి సానుకూలతాసాక్షాత్కారంకోసం,
సవినయంగా ఆవిష్కరణ ఘడియలకొసం
ఆశగా ఎదురుతెన్నులు గావిస్తున్నది.
==================================